Годинашното јубилејно 20-то издание на „Офф фест“ нема да се одржи во планираните термини од 2 до 6 јуни годинава. Како што соопштуваат организаторите во соопштение, единствена причина за одложувањето на веќе подготвената фестивалска програма е доцнењето на договорот и придружната документација, (а со тоа и благовремената исплата на неопходниот аванс) од Министерството за култура.
-Ова е прв ваков случај во историјата на „Oфф фест“, како и на постариот „Скопски џез фестивал“, на кој искрено се надеваме дека нема да му се случи нешто слично. Новите термини на „Офф фест“ се 9-13 ноември 2021. Фестивалот, годинава со значително скратен буџет, во најголем дел ќе ја зачува веќе подготвената програма, првично предвидена за реализација во јуни, со истото планирано фестивалско отворање – концертот на модерниот фадо дует Lina_Raül Refree, колаборативен проект на португалската фадо дива Lina Rodrigues и популарниот шпански артист Raül Refree, еден од најбараните и најиновативните светски продуценти во моментов, наведуваат од „Скопски Џез Фестивал“.
Овој проект, кој лани кулминираше со албумот „Lina_Raül Refree“ (Glitterbeat), своевидна модерна посвета на музиката на големата фадо легенда Amália Rodrigues, се посочува, беше оценет од критиката како еден од клучните настани на светската музичка сцена во 2020 година. Во рамки на првата фестивалска вечер на „Офф фест„ 2021 ќе биде прикажан и документарниот филм “The Art of Amália”, посветен на кралицата на португалското фадо Amália Rodrigues.
Фестивалоттребашее да започне на втори јуни со колаборативниот проект на дивата на португалско фадо Лина Родригеш и шпанскиот продуцент Раул Рефре. Мајсторот на иранско кеменче и добитник на Греми Кајхан Калхор требаше да настапи на втората вечер на 3 јуни, заедно со турскиот музичар Ердал Ерзинчан, виртуоз на баглама.
Третото потврдено име е каталонската пејачка Силвија Перес Крус, која во својот нов проект „Драма“ комбинира музика, театар, танц, филм, сликарство, фотографија и поезија.
